«Барселона» ҳужумчиси Роберт Левандовски ўзининг келажаги борасидаги саволга жавоб берди.

37 ёшли футболчининг шартномаси жорий мавсум якунида ниҳоясига етади. Польякнинг кейинги мавсумда «кўк-анорранглилар» сафидаги фаолиятини давом эттириш ёки эттирмаслиги ҳамон номаълум бўлиб қолмоқда.

«Мен ўзимга босим ўтказишни истамайман. Эҳтимол, 25 ёки 30 ёшимда ҳаммаси бошқача бўларди. Тажрибам ва ёшимни ҳисобга олсак, ҳозирнинг ўзидаёқ бир қарорга келишим тўғри эмас. Айни дамда қайси йўналишда давом этишни хоҳлашимни билмайман, шу билан бирга, ҳеч қандай стрессни ҳис қилмаяпман. Бир неча ойдан кейин нима бўлишини кўрамиз. Ҳозирча бу ҳақда билмайман ва ўйлаётганим ҳам йўқ», — дея Левандовскининг сўзларини келтиради The Athletic.

Ҳужумчи жорий мавсумда 34 та ўйинда майдонга тушиб, 14 та гол уришга муваффақ бўлди.