Ўзбекистон Суперкубоги ўйини олдидан матбуот анжумани ташкил этилди. Ушбу маросимнинг иккинчи қисмида «Нефтчи» жамоаси устози Исломбек Исмоилов ва жамоа сардори Анваржон Ғофуров иштирок этди.
«Нефтчи» устози ушбу анжуманда қуйидаги фикрларни билдириб ўтди:
«Аввало ҳаммага Ассалому алайкум. Эртанги ўйинга етарлича тайёргарлик кўрдик. Финалларда тактикадан кўра, футболчилар характери кўп нарсани ҳал қилади. Умид қиламанки, футболчиларим ғалабага муносиб ўйин кўрсата оладилар.
Ҳар бир жамоа тезкор голни хоҳлайди. Жумладан биз ҳам. Бунга албатта ҳаракат қиламиз.
Икром Алибоев эртанги ўйинга 100 фоиз тайёр.
Жамоамни «Пахтакор» билан солиштирмаган бўлардим. Жамоада ҳозир ғалабага хоҳиш юқори. Шунингдек, кайфият ҳам. Рақибдан устун томонларимизни гап билан эмас, амалда майдонда кўрсатмоқчимиз.
Доимий равишда ҳужумкор футбол кўрсатишни иложи йўқ. Ҳужум ва ҳимоя футболнинг ажралмас бир қисми.
Рақибни чуқур ўрганиб чиқдик. Майда деталларга ҳам аҳамият қаратдик. Лекин айнан қайсидир футболчига қарши персонал ўйнаш ниятимиз йўқ.
Финалда фаворит йўқ. Финалда исталган натижа бўлиши мумкин. Ушбу баҳсда хоҳиш ва истак биринчи ўринга чиқади».
Шунингдек, жамоа ҳимоячиси Анваржон Ғофуров ҳам қуйидаги фикрларни билдириб ўтди:
«Аввало Ассалому алайкум. Рамазон ойи билан ҳаммани табриклайман. Ўйинга яхши тайёргарлик кўрдик. Бу ўйинга 100 фоиз тайёрмиз.
Албатта бу финал, ҳаяжон бўлиши аниқ. Бу бизнинг биринчи Суперкубогимиз. Лекин кайфият юқори. Финалга тайёрмиз».
