«Барселона» бош мураббийи Ханс-Дитер Флик «Манчестер Юнайтед»дан ижарага олинган ҳужумчи Маркус Рэшфордни доимий асосда сотиб олишни талаб қилмоқда. Ўз навбатида, «кўк-анорранглилар» спорт директори Деку унга муқобил вариант сифатида «Челси» вингери Педру Нету номзодини кўриб чиқмоқда. Бу ҳақда The Touchline нашри ўзининг X ижтимоий тармоғидаги саҳифасида хабар берди.

Манба берган маълумотларга кўра, германиялик мутахассис Декуга 28 ёшли инглиз футболчиси ҳужумнинг чап қанотини кучайтириш учун асосий вариант эканлигини билдирган. «Манчестер Юнайтед» билан музокаралар қийин кечаётганига қарамай, Флик жамоада Рэшфорддан бошқа ҳеч кимни кўришни истамаяпти.

Аввалроқ ОАВда «Барселона» ҳужумчини «Манчестер Юнайтед»дан 30 миллион еврога сотиб олишга тайёрлиги ҳақида хабарлар тарқалган эди.

Рэшфорд Каталония жамоаси сафида барча турнирларда 38 та ўйин ўтказиб, 10 та гол ва 13 та голли узатмага муаллифлик қилди. Transfermarkt порталида тақдим этилган маълумотларга кўра, футболчининг бозор қиймати 40 миллион еврони ташкил этади.