«Барселона» бош мураббийи Ханс-Дитер Флик Испания Ла Лигаси 28-турида «Севилья» устидан қозонилган 5:2 ҳисобидаги йирик ғалабага муносабат билдирди.
«Тўпни йўқотган пайтимизда прессингни янада яхшироқ амалга оширишимиз мумкин эди. Энди Чемпионлар лигаси яқинлашяпти ва унда яхши натижа кўрсатиш муҳим. Ольмо жуда яхши ўйнади, Эспарт, Канселу ҳам. Аммо менимча, биз янада яхшироқ ҳаракат қилишимиз мумкин эди. Баъзан тўпни секин ҳаракатлантирдик, айрим вазиятларда эса ишонч етишмади. Гавининг қайтиши эса жуда яхши янгилик.
Канселуга мослашиш учун бироз вақт керак бўлди. Охирги бир нечта ўйинларда у ажойиб ўйин кўрсатмоқда. Техник жиҳатдан у жуда юқори даражадаги футболчи. Унинг голи, пенальтига олиб келган ҳаракатлари ва офсайд тузоғидаги ўйини… Канселу тўғри танлов бўлган», — дея Флик сўзларини келтиради Marca.
Айни пайтда «Барселона» Испания чемпионати турнир жадвалида 28 ўйиндан кейин 70 очко билан биринчи ўринни эгаллаб турибди. «Севилья» эса 31 очко билан 14-поғонада жойлашган.
Кейинги турда «Барселона» 22 март куни ўз майдонида «Райо Вальекано»ни қабул қилади. «Севилья» эса бир кун олдин «Валенсия»га қарши майдонга тушади.













