«Кёльн» футболчиси Саид эль-Мала кўплаб Европа грандларининг эътиборига тушди.
19 ёшли вингерга энг катта қизиқиш Англия Премьер-лигаси жамоалари томонидан бўлмоқда: унга «Манчестер Юнайтед», «Челси», «Манчестер Сити», «Ньюкасл» ва «Тоттенхэм» даъвогарлик қилмоқда. Шунингдек, истиқболли немис футболчиси «Барселона»ни ҳам қизиқтириб қолган, деб хабар беради Transfer News Live нашри Daily Briefing'га таяниб. Машҳур Transfermarkt порталида ўйинчининг нархи 40 млн евро деб баҳоланган.
Саид эль-Мала Бундеслиганинг жорий мавсумида ўтказилган 26 та ўйинда 9 та гол ва 4 та голли узатмани ўз ҳисобига ёздириб қўйди. Чиқиб келаётган юлдузнинг «Кёльн» билан шартномаси 2030 йилгача амал қилади.
