Фарғонанинг "Нефтчи" жамоаси Ўзбекистон Суперкубоги учун кечган баҳсда "Пахтакор"ни мағлуб этиб (1:0), бош совринга эга чиқди. Учрашувдан сўнг ғолиблар устози Ислом Исмоилов матбуот анжуманида иштирок этиб, ўз фикрларини билдириб ўтди.

Ғалаба ва водийлик мухлислар ҳақида

"Аввало, ушбу зафар билан бутун Фарғона аҳлини ва ишқибозларимизни табриклайман. Стадионда нафақат фарғоналик, балки андижонлик ва наманганлик мухлислар ҳам бизни ажойиб тарзда қўллаб-қувватлашди. Уларга катта раҳмат айтаман. Ўйин жуда очиқ ва ҳужумкор руҳда ўтди, якунда омад бизга кулиб боқди".

Услубдаги ўзгаришлар ва прессинг

Мураббий жамоа ўйинидаги ўзгаришлар ва Виталий Левченко давридан қолган мерос ҳақида ҳам тўхталди:

"Ўтган мавсумда жамоа кўпроқ ҳимоявий футболга таянарди. Биз эса йигитларни ҳужумкор ўйин кўрсатишга мажбурлаяпмиз ва улар кўрсатмаларни аъло даражада бажаришмоқда. "Пахтакор"га қарши баҳсда рақибга эркинлик бермаслик учун дастлабки дақиқалардан гегенпрессинг қўлладик. Одатда жамоалар "Пахтакор"га тўпни бериб қўйишади, биз эса бу хатога йўл қўймадик".

Марказдаги танлов ва футболчилар маҳорати

"Рақибнинг марказий чизиғи кучлилигини инобатга олиб, майдон марказига Жокич ва Ратиниони туширдик. Улар бир-бирини тўлдириб ҳаракат қилишди. Тўғри, "Пахтакор"да ҳам маҳоратли, миллий терма жамоа аъзолари кўп, аммо бундай финалларда тактикадан кўра характер биринчи планга чиқади. Бугун йигитларимиз матонат кўрсата олишди".

Танқидлар ва ўзбек мураббийлари ҳақида

"Мавсум бошидаги негатив фикрлардан ҳайрон қолгандим. Аксинча, ўзимизнинг маҳаллий мураббийларни қўллаб-қувватлашимиз керак, ахир ҳаммамиз шу ватан учун меҳнат қиляпмиз. Мен бундай гапларга чалғимайман. Энг асосий мақсадим — меҳнатим ва натижаларим орқали барча саволларга жавоб бериш", — деди Исмоилов.