«Арсенал» бош мураббийи Микель Артета матбуот анжуманида ҳимоячилар — Юррьен Тимбер ва Бен Уайтнинг ҳолати ҳақидаги саволларга жавоб берди. Маълумки, Тимбер Премьер-лига доирасидаги «Эвертон»га қарши ўйинда жароҳат олиб, майдонни тарк этган эди.
«Тимбернинг жароҳатига келсак, бу бир неча кунлик масала. Унинг ўйинга тайёр эканлигига ишончим комил эмас. Бизга ҳозир ҳамма сафда бўлиши жуда муҳим. Бен Уайт бизга нима беришини яхши биламиз. У бугун машғулотларда қатнашди, шундай экан, ҳаммаси жойида. Ҳар бир футболчининг жамоага қўшадиган ҳиссаси биз учун аҳамиятли», — деди Артета матбуот анжуманида.
Сешанба, 17 март куни «Арсенал» ўз майдонида Чемпионлар Лигаси доирасида «Байер»ни қабул қилади. Жамоаларнинг Германиядаги илк учрашуви 1:1 ҳисобидаги дуранг билан якунланган эди.
