Англиянинг "Ливерпуль" клуби шу ёзда "Реал Мадрид" ярим ҳимоячиси Эдуардо Камавингани ўз сафига қўшиб олиш устида фаол иш олиб бормоқда.
Мадриддаги ноаниқ келажак
Хабарларга кўра, Испания клуби раҳбарияти 23 ёшли футболчи бўйича тушадиган таклифларни кўриб чиқишга тайёрлигини билдирган. Бунга сабаб сифатида Камавинганинг жорий мавсумда етарли ўйин амалиётига эга бўла олмаётгани кўрсатилмоқда. Француз футболчиси Ла Лиганинг ҳозиргача бўлиб ўтган 22 та учрашувидан фақат 13 тасини асосий таркибда бошлаган, холос.
Мерсисайдликларнинг қизиқиши
"Ливерпуль" Камавингани жамоа ярим ҳимоя чизиғини кучайтира оладиган асосий номзод сифатида кўрмоқда. Футболчининг универсаллиги ва ёш бўлишига қарамай катта тажрибага эга эканлиги инглиз клуби скаутларини ўзига жалб қилган.
Агар "қироллик клуби" молиявий жиҳатдан манфаатли таклиф олса, Эдуардо ёзда "Энфилд"га кўчиб ўтиши эҳтимоли юқори.
