Италиянинг "Рома" клуби шарафини ҳимоя қилаётган марокашлик ярим ҳимоячи Нейл Эль-Айнауи қуролли ҳужум натижасида ўз мулкининг бир қисмидан айрилди. Бу ҳақда ANSA агентлиги хабар бермоқда.
Манбанинг маълумотига кўра, тунда ниқоб таққан олти кишидан иборат жиноий гуруҳ футболчининг Римнинг Кастель-Фузано туманидаги уйига бостириб кирган. Босқинчилар меҳмонхона деразаси орқали ичкарига кириб, 24 ёшли футболчи, унинг онаси, севган қизи, акаси ва акасининг севган қизини бир хонага қамаб қўйишган. Шундан сўнг улар қимматбаҳо буюмларни қидиришга тушишган.
Қонунбузарлар футболчининг уйидан қиймати тахминан 10 000 евролик заргарлик буюмлари, Rolex соати ва дизайнерлик сумкаларини олиб чиқиб кетишган. Ҳолат юзасидан тергов ҳаракатлари бошланган.
