Бразилиянинг энг совриндор жамоаларидан бири — «Сантос» янги бош мураббий билан шартнома имзоланганини эълон қилди. Ушбу лавозимни Кука номи билан машҳур бўлган маҳаллий мутахассис Алекси Стивал эгаллади.
Аввалги устоз (аргентиналик Хуан Пабло Войвода) жамоанинг мавсум бошидаги қониқарсиз иштироки туфайли истеъфога чиқарилган эди. «Сантос» 7 турда 6 очко жамғариб, қуйи лигага тушиб кетиш ҳудудига яқин турибди.
Таъкидлаш жоизки, бу Куканинг «Сантос»га тўртинчи бор қайтишидир. У жамоа билан 2008, 2018 ва 2020–2021 йилларда ишлаган. Кука «Атлетико Минейро» билан Либертадорес кубогида ғолиб чиққан, шунингдек, ушбу жамоа ва «Палмейрас» билан Бразилия чемпиони бўлган. Бундан ташқари, унинг ҳисобида «Шандунь» билан Хитой чемпионати ва кубогидаги ғалабалар ҳам мавжуд.
