«Ливерпуль» жорий мавсум якунланганидан кейин нидерландиялик ҳужумчи Коди Гакпо билан хайрлашиши мумкин. Бу ҳақда Teamtalk портали журналистлари хабар бермоқда.
Манба берган маълумотларга кўра, мерсисайдликлар аллақачон жамоа таркибида Гакпонинг ўрнини эгаллаши мумкин бўлган футболчини танлаб бўлишган. «Қизиллар»нинг танлови «Ньюкасл» вингери Энтони Гордонга тушган.
Англия Премьер-лигасининг жорий мавсумида нидерландиялик футболчи 28 та учрашувда майдонга тушди. Коди ўз ҳисобига олтита гол ва учта голли узатмани ёздириб қўйишга муваффақ бўлди.
Гакпо 2023 йилнинг январидан буён мерсисайдликлар шарафини ҳимоя қилиб келмоқда. Томонлар ўртасидаги амалдаги шартнома муддати 2030 йилнинг июнь ойи охирида якунига етади. Ҳужумчининг бозор қиймати 65 миллион еврога баҳоланмоқда.
