Хорватиялик ярим ҳимоячи Лука Модрич 2018 йилда қўлга киритган “Олтин тўп” совринини “Милан” ва унинг мухлислари учун клуб музейига топширди. Ушбу нуфузли мукофот эндиликда Casa milan қароргоҳида жойлашган Mondo Milan музейидан жой олди. Бу ҳақда клуб матбуот хизмати хабар берди.

“Бугундан бошлаб Mondo Milan музейи ўзига хос экспонат – Лука Модричнинг ‘Олтин тўп’ совринини қабул қилди. Клуб юлдузининг ушбу совғаси мухлислар учун мўлжалланган бўлиб, соврин унинг ажойиб фаолияти ҳақида ҳикоя қилувчи иқтибослар ва суратлар билан безатилган махсус витринага жойлаштирилади. Бу Лука ва жамоа ўртасидаги яқин ришталарнинг рамзи бўлиб, ушбу боғлиқлик у ўтган ёзда Италияга келишидан анча олдин бошланган. Бизнинг 14-рақамли футболчимиз болалигиданоқ ‘россонери’га меҳр қўйган”, дейила клуб хабарида.

41 ёшли Модрич футболдаги энг олий шахсий мукофотни “Милан” мухлислари кўриши учун тақдим этишга қарор қилди. У “Олтин тўп”ни 2018 йилда қўлга киритган эди. Ўша йили у “Реал Мадрид” билан кетма-кет учинчи бор УЕФА Чемпионлар Лигасида ғолиб чиққан ва Хорватия терма жамоаси билан Жаҳон чемпионати финалига қадар етиб борган ҳолда, ушбу шарафга лойиқ кўрилган илк хорватиялик футболчига айланган эди.

“Ушбу либосни кийган илк кунимданоқ буни орзунинг ушалиши деб билдим. Сўнгги ойлар давомида мени ҳар томонлама қўллаб-қувватлаган мухлисларимизга миннатдорчилик билдириш мақсадида шахсий совринимни улар билан баҳам кўришга қарор қилдим. Форза, Милан”, дейди Модрич.

Қайд этилишича, Италиянинг энг кўп ташриф буюриладиган футбол музейига келувчилар ҳар куни соат 10:00 дан 19:00 га қадар Модричнинг “Олтин тўп”ини ўз кўзлари билан кўриш имкониятига эга бўлади.

Маълумот учун, Модрич жорий мавсум “Милан” таркибида 31 ўйинда майдонга тушиб, 2 та гол ва 3 та голли узатмани ўз ҳисобига ёздириб қўйган. Transfermarkt портали ярим ҳимоячининг қийматини 4 миллион еврога баҳоламоқда.