«Манчестер Сити» ярим ҳимоячиси Бернарду Силва келаётган ёзда «шаҳарликлар» билан шартномаси якунланиши муносабати билан «Барселона»га ўтишни ўз олдига асосий мақсад қилиб қўйди. Унинг номзоди агент Жорже Мендеш орқали каталонияликларга таклиф қилинган. Бу ҳақда Sport.es нашри хабар бермоқда.

Манбанинг маълумотларига кўра, Каталония клуби Бернарду билан шартнома имзоланишини «қизиқарли келишув» деб ҳисоблайди, бироқ ҳозирда жамоада ушбу позицияда футболчилар жуда кўплигини ҳам тушуниб турибди. «Барселона» «Манчестер Сити» сардорининг трансферига биринчи даражали вазифа сифатида қарамаяпти, чунки «блауграна» биринчи навбатда марказий ҳимоячи ва ҳужумчи сотиб олишни истайди. Шу билан бирга, сине-гранатоликлар 31 ёшли ярим ҳимоячининг маҳоратига шубҳа қилишмаяпти.

Жорий мавсумда Бернарду барча турнирларда 41 та ўйинда иштирок этиб, ўз ҳисобига 3 та гол ва 5 та голли узатмани ёздириб қўйди. Transfermarkt портали тақдим этган маълумотларга кўра, футболчининг бозор қиймати 27 миллион еврони ташкил этади.