«Барселона» клуби Дортмунднинг «Боруссия» ҳужумчиси Серу Гирассига қизиқиш билдирмоқда. «Кўк-анорранглилар» 30 ёшли форвард бўйича музокараларга киришишга ҳаракат қилади. Бу ҳақда Sport.es нашри Alyaumга таяниб хабар бермоқда.

Манбанинг маълумотларига кўра, гвинеялик футболчининг эҳтимолий трансферига Саудия Арабистонининг «Ал-Иттиҳод» клуби тўсқинлик қилиши мумкин. Саудияликлар Гирассини жамоани тарк этган Карим Бенземанинг ўрнини босувчи номзод сифатида кўришмоқда. Таъкидланишича, ёзда «асаларилар» сафини тарк этишга тайёр бўлган ҳужумчига «Барселона»нинг қизиқиши «Ал-Иттиҳод» раҳбариятини хавотирга солган.

Жорий мавсумда форвард барча турнирларда 39 та ўйинда иштирок этиб, ўз ҳисобига 18 та гол ва 6 та голли узатмани ёздириб қўйди. Футболчининг клуб билан амалдаги шартномаси 2028 йилнинг ёзига қадар мўлжалланган. Transfermarkt портали тақдим этган маълумотларга кўра, Гирассининг бозор қиймати 40 миллион еврони ташкил этади.