Лондоннинг «Челси» клуби Мадриднинг «Реал» ярим ҳимоячиси Эдуарду Камавингани сотиб олиш борасида «Ливерпуль»га жиддий рақобат туғдириши мумкин. «Кўклар» франциялик футболчига Энцо Фернандеснинг клубдаги келажаги сўроқ остида қолаётган бир пайтда қизиқиш билдирмоқда. Бу ҳақда Caught Offside нашри хабар бермоқда.

Манбанинг маълумотларига кўра, «Челси» ва «Ливерпуль» Камавинганинг атрофидаги инсонлар билан алоқа ўрнатишга ҳаракат қилмоқда. Ҳозирги босқичда мерсисайдликлар бу йўналишда каттароқ натижаларга эришишган.

Аввалроқ журналист Маттео Моретто «Реал» Мадрид 23 ёшли футболчи учун 50 миллион евро миқдоридаги таклифларни кўриб чиқишга тайёрлиги ҳақида хабар берган эди.

Жорий мавсумда Камавинга барча турнирларда 33 та ўйинда иштирок этиб, ўз ҳисобига 2 та гол ва 1 та голли узатмани ёздириб қўйди. Футболчининг клуб билан амалдаги шартномаси 2029 йилнинг ёзига қадар мўлжалланган. Transfermarkt портали тақдим этган маълумотларга кўра, унинг бозор қиймати 50 миллион еврони ташкил этади.