Мадриднинг «Реал» клуби бош мураббийи Альваро Арбелоа жароҳатидан сўнг сафга қайтган ҳужумчи Килиан Мбаппе ҳақидаги саволга жавоб берди. Франциялик футболчи якшанба куни «Атлетико»га қарши кечган дербида «қаймоқранглилар»нинг асосий таркибидан жой олмади, бироқ 64-дақиқада захирадан майдонга тушди.

«Шубҳасиз, агар дунёнинг энг яхши футболчиси тайёр бўлса, унинг майдонда имкон қадар кўпроқ вақт ўтказишини хоҳлайсиз. Аммо Килиан қарийб бир ой давомида сафда бўлмади, шу сабабли уни асосий таркибга аста-секин қайтараётганимиз табиий ҳол деб ўйлайман.

Мбаппе захирадан тушганидан сўнг ўзини кўрсата олди — у доимий равишда рақиб дарвозасига хавф туғдириб турди. Ишончим комил, энди у терма жамоа ихтиёрида ўйин амалиётига эга бўлади ва клуб ихтиёрига яхши спорт формасида қайтади», — деди Арбелоа матбуот анжуманида.

«Атлетико» дарвозасига киритилган голларга Винисиус Жуниор (дубль) ва Федерико Вальверде муаллифлик қилишди.