Мадрид дербисидан кейинги эҳтирослар тингани йўқ. Испания Ҳакамлар техник қўмитаси (CTA) «Реал» ва «Атлетико» (3:2) ўртасидаги баҳсда юз берган баҳсли вазият — Федерико Вальверденинг майдондан четлатилиши юзасидан ўз хулосасини билдирди.
Эслатиб ўтамиз, учрашувнинг 77-дақиқасида уругвайлик ярим ҳимоячи рақиби Алекс Баэнанинг оёғига орқадан зарба берган ва бош ҳакам Хосе Мунуэра Монтеро томонидан тўғридан-тўғри қизил карточка билан жазоланган эди. Ўшанда ВАР вазиятга аралашмаганди.
Машҳур El Chiringuito кўрсатувида журналист Хуанфе Санс Переснинг таъкидлашича, ҳакамлар қўмитаси Монтерони тўлиқ қўллаб-қувватлаган. Қўмита фикрича, Вальверденинг ҳаракати ўйин қоидасини қўпол равишда бузиш деб баҳоланган ва жазо тўғри тайинланган. Бу борадаги расмий баёнот сешанба куни эълон қилиниши кутилмоқда.
Агар «Реал Мадрид» томонидан берилган апелляция рад этилса (бу эҳтимол жуда юқори), Феде Вальверде Ла Лиганинг камида 2 та ўйинини ўтказиб юбориши мумкин.
