«Реал» бош мураббийи Альваро Арбелоа Пеп Гвардиола, Жозе Моуриньо ва Диего Симеоне бошқарувидаги жамоалар устидан қозонилган ғалабалар ҳақида тўхталиб ўтди.
«Бу менинг жамоам қанчалик ажойиб эканлигидан далолат беради. Ихтиёрингизда ўз ишига содиқ энг яхши футболчилар бўлса, улар ҳозиргидек иштиёқ билан ҳаракат қилишса, қийинчиликларга бардош беришни ва яхлит жамоа бўлишни билишса — ҳаммаси анча осонлашади.
«Бернабеу» бизни тобора кўпроқ қўллаб-қувватлаётганидан хурсандман. Мен футболчиларга тез-тез айтаман: биз бундан максимал даражада фойдаланишимиз керак. Чунки «Бернабеу» рақибга босим ўтказса, ҳамма нарса енгиллашади ва майдон гўёки биз томонга оғиб қолгандек туюлади.
Барча футболчиларга — асосий таркибдагиларга ҳам, захирада қолаётганларга ҳам меҳнатлари ва садоқатлари учун миннатдорчилик билдираман. Мен футболчиларнинг иложи борича жипслашишини, улар ҳақиқий оилага айланишини, дўстлик кучини кўрсатишларини, ажойиб муҳитни сақлаб қолишларини ва ғалаба қозонишда давом этишларини истайман, чунки энг муҳими шу», — деди Альваро Арбелоа.
