«Милан» клуби собиқ ҳужумчиси Андрей Шевченко Италия А сериясидаги чемпионлик унвони учун кечаётган кураш ҳақида ўз фикрларини билдириб ўтди.

«Интер» турли даражадаги футболчилардан ташкил топган анча кенг таркибга эга, уларда устунлик бор. Аммо «Милан» ажойиб мавсумни ўтказмоқда. «Торино» устидан қозонилган ғалаба — олдинга ташланган қадам бўлди. Аллегри «Лацио»дан учралган мағлубиятдан сўнг жамоани ўзига келтира олди. Менимча, «Милан» навбатдаги бир нечта ўйинда ғалаба қозонади ва «Интер»га босим ўтказади. Агар «Милан» «Интер»га яқин масофада қолишда давом этса, ҳар қандай кутилмаган воқеа юз бериши мумкин», — деди Шевченко Milannews нашрига берган интервьюсида.

30-турдан сўнг А сериянинг кучли учлиги қуйидагича кўриниш олган: «Интер» (69 очко), «Милан» (63 очко), «Наполи» (62 очко).