«Арсенал» сардори Мартин Эдегор 4 апрель куни «Саутгемптон»га қарши бўлиб ўтадиган Англия Кубоги баҳсида майдонга қайтишни мақсад қилган. Бу ҳақда Football London нашри хабар бермоқда.

Ярим ҳимоячи дастлаб «Брентфорд»га қарши ўйинда орттириб олган жароҳатини «Шимолий Лондон дербиси»да қайталаб юборган эди. Шундан сўнг, «Арсенал» кутилмаган салбий оқибатларнинг олдини олиш мақсадида футболчининг тўлиқ ва эҳтиёткорона реабилитация дастурига асосий эътиборни қаратди.

Гарчи Эдегорнинг кубок финали қайдномасига киритилиши борасида ижобий тахминлар бўлган бўлса-да, якунда халқаро танаффусдан сўнг мавсумнинг қолган қисмида оптимал ҳолатда қайтишини таъминлаш учун таваккал қилмасликка қарор қилинди.

Эдегор халқаро танаффус вақтида машғулот майдонида ўз жамоадошлари — Габриэль Магальяэс, Эберечи Эзе, Леандро Троссард, Вильям Салиба ва Юрриен Тимбер билан бирга шуғулланиши кутилмоқда. Уларнинг барчаси терма жамоа ихтиёрига боришдан бош тортган.