Килиан Мбаппе жароҳатидан тикланиш жараёни кутилгандан узоқроқ давом этмоқда.

The Athletic маълумотига кўра, "Реал Мадрид" тиббий штаби текширув пайтида жиддий хатога йўл қўйган. Хабар қилинишича, декабрь ойида футболчининг илк шикоятларидан сўнг ўтказилган МРТ текширувида шифокорлар нотўғри оёқни текширган.

Яъни, мутахассислар жароҳатланган чап тизза ўрнига соғлом ўнг тиззани ўрганиб чиқишган ва муаммо топилмаганидан кейин футболчига тўлиқ юкламаларга рухсат берилган. Бу эса қисқа вақтдан сўнг Мбаппенинг жароҳатланган тиззасида яллиғланиш кучайишига олиб келган.

Француз ҳужумчиси илк бор 7 декабрь куни "Сельта"га қарши ўйиндан кейин ноқулайлик ҳис қилган. Шу сабабли у Чемпионлар лигасида "Манчестер Сити"га қарши баҳсни ўтказиб юборган, аммо 2025 йил охиригача яна учта ўйинда майдонга тушиб, тўртта гол урган.

Баҳорда муаммолар яна кучайгач, Мбаппе иккинчи фикр олиш учун Парижга йўл олди. Шундан сўнг у жамоа сафига қайтган бўлса-да, «Манчестер Сити» (2:1) ва Атлетико Мадрид (3:2)га қарши ўйинларда жами 49 дақиқа ҳаракат қилди.

Шунга қарамай, Мбаппе Франция миллий жамоаси йиғинига йўл олди. Французлар 26 ва 29 март кунлари Бразилия ҳамда Колумбияга қарши ўртоқлик учрашувларида майдонга тушишади.