Англия Премьер-лигаси матбуот хизмати мисрлик ҳужумчи Муҳаммад Салоҳнинг жорий мавсум якунида «Ливерпуль»ни тарк этиши ҳақидаги хабарга муносабат билдирди.

«Муҳаммад Салоҳ. Ҳозир ва абадий «Ливерпуль» афсонаси», — дейилади АПЛ томонидан эълон қилинган баёнотда.

Эслатиб ўтамиз, Салоҳ мерсисайдликлар таркибида Англия чемпиони бўлган. Бундан ташқари, мисрлик футболчи бир неча бор АПЛ «Олтин бутса»сини қўлга киритган.

Англия чемпионатининг жорий мавсумида 33 ёшли ҳужумчи 22 та учрашувда майдонга тушиб, ўз ҳисобига 5 та гол ва 6 та голли узатмани ёздириб қўйди. Футболчининг бозор қиймати 30 миллион еврога баҳоланмоқда.