Лондоннинг «Челси» клуби марказий ҳужумчиси Жоао Педро «Барселона»нинг қизиқишлари доирасида бўлиб турибди.

Таниқли журналист Саймон Филлипснинг хабар беришича, «Барселона» спорт директори Деку 24 ёшли бразилиялик футболчининг вакили билан эҳтимолий трансфер масаласида боғланган. Бироқ Педронинг ўзи «Стэмфорд Бридж»ни тарк этиш нияти йўқлигини аниқ билдирган.

Педро ўтган ёздан бери «Челси» шарафини ҳимоя қилиб келмоқда. Ўшандан бери у барча мусобақаларда 43 та ўйинда майдонга тушиб, 18 та гол урди ва 9 та голли узатмани амалга оширди.

Педронинг «Челси» билан шартномаси 2033 йилгача мўлжалланган бўлиб, Transfermarkt маълумотларига кўра, футболчининг бозор қиймати 75 миллион еврони ташкил этади.