Дортмунднинг «Боруссия» клуби ҳужумкор ярим ҳимоячиси Юлиан Брандт ёзда жамоасини ўзгартиради. 29 ёшли футболчи жорий мавсум якунланиб, амалдаги шартномаси муддати тугагач, эркин агентга айланади.
Инсайдер Николо Скиранинг хабар беришича, германиялик футболчининг хизматларига Англиянинг «Астон Вилла», Италиянинг «Рома» ва Туркиянинг «Фенербахче» клублари қизиқиш билдирмоқда. Аввалроқ, ўйинчига Миланнинг «Интер», Лондоннинг «Арсенал» ва бошқа кўплаб клублар даъвогарлик қилаётгани ҳақида хабарлар тарқалган эди.
Юлиан Брандт «Боруссия» сафида етти йилни ўтказди. Жорий мавсумда у дортмундликлар либосида барча турнирларда 34 та учрашувда майдонга тушиб, 10 та гол ва 3 та голли узатмани ўз ҳисобига ёздириб қўйди.
