Афсонавий португалиялик ҳужумчи Криштиану Роналдунинг ўғли — кичик Криштиану Роналду куни кеча Мадриднинг «Реал» академияси билан машғулот ўтказди. Бу ҳақда New York Times журналистлари хабар бермоқда.
Яқин келажакда 15 ёшли Криштиану «қироллик клуби»нинг ёшлар жамоасига қўшилиши мумкин. Ҳозирда кичик Роналду «Ан-Наср» академиясида шуғулланмоқда, ушбу клубнинг асосий жамоасида унинг отаси тўп суради.
Катта Криштиану 2023 йилнинг январидан бери Саудия жамоасида ўйнаб келмоқда. 41 ёшли ҳужумчи ва «Ан-Наср» ўртасидаги амалдаги меҳнат шартномаси 2027 йилнинг июнь ойи охирида якунига етади.
