Мадриднинг «Реал» клуби ҳужумчиси Килиан Мбаппе ўзи майдонда бўлмаган вақтда жамоа кўрсатган натижалар ҳақида фикр билдирди.
Франциялик футболчи жароҳати сабабли «қаймоқранглилар»нинг бешта ўйинини ўтказиб юборди, охирги икки учрашувда эса иккинчи бўлимда захирадан майдонга тушди. Мбаппе асосий таркибда бўлмаган жами еттита ўйинда Альваро Арбелоа шогирдлари олтита ғалабага эришиб, бир бор мағлубиятга учрашди.
«Ҳозир мавсумнинг жуда муҳим палласи. Мен жамоанинг менсиз ҳам ғалаба қозонишини хоҳлагандим ва бунга эришилганидан хурсандман. Жароҳат олган вақтимда кўпчилик мени ягона ечим деб айтганди, аммо бу ундай эмаслиги маълум бўлди. Бу жуда яхши», — дея ҳужумчининг сўзларини келтиради Madrid Xtra.
Пайшанба куни Килиан Мбаппе бир ойдан кўпроқ вақт ичида илк бор учрашувни асосий таркибда бошлаши мумкин — Франция терма жамоаси Бразилияга қарши ўртоқлик ўйини ўтказади.
