Лондоннинг “Арсенал” клуби ёзги трансфер ойнасида “ПСЖ” ҳужумчиси Хвича Кварацхелияни ўз сафига қўшиб олиш имкониятларини ўрганмоқда. Бу ҳақда The Independent нашри журналисти Мигел Дилейни ўзининг X (собиқ Twitter) саҳифасида маълум қилди.

Манбанинг таъкидлашича, 25 ёшли футболчининг вакиллари турли таклифларни кўриб чиқишга тайёр. Лондонликлар Кварацхелия трансфери борасида жиддий бел боғлаган бир пайтда, “ПСЖ” раҳбарияти грузиялик ҳужумчини таркибда сақлаб қолмоқчи эканини ва у бўйича келадиган ҳар қандай таклифни рад этишини маълум қилган.

Эслатиб ўтамиз, Хвича Кварацхелия 2025-йилнинг январь ойида Париж клубига келиб қўшилган эди. Якунланаётган мавсумда футболчи барча турнирлар доирасида жами 37 та ўйинда майдонга тушиб, ўз ҳисобига 12 та гол ва 7 та самарали узатмани ёздириб қўйди. Transfermarkt портали ҳужумчининг айни пайтдаги бозор қийматини 90 миллион еврога баҳоламоқда.