Мадриднинг «Атлетико» клуби ҳужумчи Хулиан Альваресни бошқа жамоаларга, хусусан, унга қизиқиш билдираётган «Барселона»га ўтиб кетишининг олдини олиш мақсадида янги шартнома таклиф қилишга тайёр. Бу ҳақда Sport.es нашри Marcaга таяниб хабар бермоқда.
Манбанинг таъкидлашича, «матрасчилар» аргентиналик форвардни дарвозабон Ян Облак билан бир қаторда жамоанинг энг кўп маош олувчи футболчисига айлантириши мумкин. Аввалроқ ОАВда дарвозабоннинг маоши йилига тахминан 20 миллион еврони ташкил қилиши ҳақида хабарлар тарқалган эди.
Қайд этилишича, «Атлетико» Альварес билан амалдаги келишувни яна бир ёки икки йилга узайтиришни мақсад қилган. Бунда ҳужумчининг йиллик маоши 10 миллион евродан ортиқ бўлиши кўзда тутилмоқда.
