Германия терма жамоаси ярим ҳимоячиси Флориан Вирц Швейцарияга қарши кечган (4:3) шиддатли ўртоқлик учрашувидаги улкан перформансидан сўнг интервью берди.
«Ливерпуль» вакили Бундестимнинг барча тўртта голида бевосита иштирок этди: 26 ва 45-дақиқаларда у жамоадошларига голли узатма етказиб берган бўлса, 61 ва 85-дақиқаларда ижросига кўра ажойиб бўлган иккита гол муаллифига айланди.
«Терма жамоадаги энг яхши ўйинимми? Эҳтимол, ҳа. Самадорлик нуқтаи назаридан — шундай. Агар биринчи голим содир бўлган вазиятда тўпни айнан ўша ерга йўлламоқчи эдим, десам, ёлғон гапирган бўламан. Иккинчи голда эса ҳаммаси бошқача бўлди: мен зарбани айнан ўзим истаган нуқтага йўлладим», — дея Вирцнинг сўзларини келтирмоқда Bayern & Germany.
30 март куни Юлиан Нагельсманн шогирдлари Гана терма жамоасига қарши майдонга тушадилар.
