Европа футбол ассоциациялари иттифоқи (УЕФА) Сербиянинг “Црвена Звезда” клубини Европа Лигаси доирасидаги Франциянинг “Лилль” жамоасига қарши ўйинда трибуналарда авлиё тасвири акс этган баннерлар учун жазолашга қарор қилди. Бу ҳақда Mundo Deportivo нашри хабар берди.

Авлиё портрети мухлисларнинг синхрон акцияси натижасида ҳосил қилинган. Тасвир остига эса “Эътиқодимиз бизни ғалаба сари етакласин” деган жумла ёзилган. УЕФА ушбу акцияни “спорт тадбири учун номуносиб” деб топди ва клубни “футбол ҳамда УЕФА нуфузига путур етказиш”да айблаб, 40 минг евро миқдорида жаримага тортди.

Умумий ҳисобда, “Црвена Звезда” мазкур учрашувдан сўнг мухлисларининг хулқ-атвори учун жами 95,5 минг евро жарима тўлайдиган бўлди. Хусусан, ишқибозлар майдонга турли буюмлар улоқтиришган ва фаерлар ёққан.

Эслатиб ўтамиз, 26 февраль куни Белградда бўлиб ўтган учрашув “Црвена Звезда”нинг 0:2 ҳисобидаги мағлубияти билан якунланган эди. Плей-офф босқичининг дастлабки ўйинида жамоа сафарда “Лилль” устидан 1:0 ҳисобда ғалаба қозонган эди. Икки ўйин натижасига кўра, Франция жамоаси турнирнинг кейинги босқичига йўл олди.

Аввалроқ, ташкилот Чемпионлар Лигаси доирасида ўтказилган плей-офф босқичи дастлабки учрашувида мухлислар томонидан ирқчилик ва камситувчи хатти-ҳаракатлар содир этилгани учун “Бенфика”кани 40 минг евро миқдорида жаримага тортган эди. Бундан ташқари, клуб УЕФА назоратидаги навбатдаги уй учрашуви учун 500 дона чипта сотиш ҳуқуқидан маҳрум этилган. Мухлислар томонидан лазер кўрсаткичидан фойдаланилгани учун эса клуб яна 8 минг евро жарима тўлши белгиланган.