Италия терма жамоаси билан 2000 йилги Европа чемпионати кумуш медалини қўлга киритган собиқ ярим ҳимоячи Массимо Амброзини «Милан»нинг икки футболчиси Жаҳон чемпионатига бориш имкониятлари ҳақида ўз фикри билан ўртоқлашди. Гап французлар — Юссуф Фофана ва Кристофер Нкунку ҳақида бормоқда.

«Менга Фофана ёқади. Техник нуқтаи назардан у кўпчилик ўйлаганидан яхшироқ ўйнайди. Аммо унинг Жаҳон чемпионати учун терма жамоа қайдномасига киришига ишончим комил эмас. Мен шунчаки рўйхатга қараяпман: Камавинга, Канте, Коне, Рабио, Чуамени, Заир-Эмери. Шундай экан, унга жуда қийин бўлади», — дея Амброзинининг сўзларидан иқтибос келтиради GFFN.

«Нкунку учун эса бундан ҳам қийинроқ бўлади! У «Милан»га ўтган вақтида энг яхши спорт формасида эмасди, чунки анчадан бери машғулот ўтказмаганди. Январь ва февраль ойларида ишлари бироз юришиб кетди, бир нечта муҳим голлар урди. Аммо энди «Милан»да Фюллькруг бор, Сантьяго Хименес қайтди. Мавсумнинг сўнгги саккизта ўйинида Нкункуда имкониятлар кўп бўлишига шубҳам бор».

Фофана сўнгги Жаҳон ва Европа чемпионатларида иштирок этган. Нкунку эса жароҳат туфайли қайдномадан чиқиб кетгани сабабли Қатардаги мундиалда ўйнамаган эди.