Ҳимоячи Алессандро Бастони шу ёзда «Интер»ни тарк этиши мумкин — футболчи «Барселона»га ўтишга яқин турибди.
La Gazzetta dello Sport нашрининг маълумотларига кўра, Милан клуби аллақачон Бастонига ўринбосар қидиришни бошлаган. «Лацио» аъзоси Марио Хила ушбу роль учун асосий номзодлардан бири бўлиб турибди.
Марио Хила 2022 йилда 6 миллион евро эвазига «Реал»дан «Лацио»га ўтган эди. 25 ёшли испаниялик футболчининг шартномаси 2027 йил 30 июнгача мўлжалланган. Жорий мавсумда ҳимоячи Рим клуби сафида барча турнирларда 30 та ўйинда майдонга тушди, бироқ самарали ҳаракатларни амалга оширмади. Transfermarkt портали Хиланинг қийматини 30 миллион еврога баҳоламоқда. Футболчи «Реал» тарбияланувчиси ҳисобланади.
