Бразилия терма жамоаси бош мураббийи Карло Анчелотти Италия клубларининг Чемпионлар Лигасидаги муаммолари ҳақида ўз фикрлари билан ўртоқлашди.

Энг нуфузли еврокубокнинг жорий мавсумида А Сериянинг бирорта ҳам вакили чорак финалга қадар етиб бора олмади. 1/8 финал босқичида Италия шарафини фақат «Аталанта» ҳимоя қилди ва икки ўйин натижасига кўра «Бавария»га 2:10 ҳисобида имкониятни бой берди.

«Мен А Серия ва бошқа чемпионатлар ўртасидаги суръат (темп) фарқини алоҳида таъкидлаган Фабио Капеллонинг фикрига қўшиламан. Чемпионлар Лигасида бу фарқ яққол кўзга ташланиб қолади. «Наполи», «Интер» ва «Ювентус»нинг жуда эрта чиқиб кетгани, «Аталанта» эса «Бавария»дан ўнта гол ўтказиб юборгани бежиз эмас», — деди Анчелотти.

Ўтган йили «Интер» финалгача етиб борган эди, бироқ ҳал қилувчи баҳсда «ПСЖ»га 0:5 ҳисобида мағлуб бўлганди.