«Фиорентина» марказий ҳужумчиси Мойзе Кин фаолиятини Италиянинг бошқа бир клубида давом эттириши мумкин. Бу ҳақда Calciomercato нашри хабар бермоқда.

Манбанинг маълумотларига кўра, «Милан» 26 ёшли италиялик ҳужумчини «бинафшаранглилар»дан сотиб олмоқчи. Бироқ таъкидланишича, «россонери» футболчининг шартномасида кўрсатилган 62 миллион евролик товон пулини тўлашни истамаяпти ва келишувни арзонроқ нархда амалга оширишга умид қилмоқда.

Жорий мавсумда Кин барча турнирларни ҳисобга олганда 32 та ўйинда майдонга тушиб, тўққизта гол урди ва тўртта голли узатмани ўз ҳисобига ёзиб қўйди.

Transfermarkt портали маълумотларига кўра, ҳужумчининг бозор қиймати 40 миллион еврони ташкил этади.