"Ньюкасл Юнайтед" клуби УЕФАнинг молиявий қоидаларини бузгани учун жазоланиши мумкин. Бу ҳақда The Times нашри хабар бермоқда.
Манбанинг маълумотига кўра, клуб "Сент-Жеймс Парк" стадионини ижарага бериш ҳуқуқини шўъба корхонасига сотишдан олинган фойдадан фойдалана олмайди. "Қарғалар" молиявий ҳисоботларга кўра, стадион ва унга туташ ерларни ижарага бериш ҳуқуқини сотишдан 133,1 миллион фунт стерлинг миқдорида фойда кўрган.
Қайд этилишича, АПЛ клубларга фойда ва барқарор ривожланиш қоидаларига риоя қилишда ёрдам бериш учун активларни шўъба корхоналарига сотишни фойда сифатида декларация қилишга рухсат беради. Бироқ, УЕФА бу масалада қаттиққўлроқ ёндашувга эга ва ўтган йили худди шундай қоидабузарлик учун "Челси"ни (27 миллион фунт стерлинг) ва "Астон Вилла"ни (11 миллион фунт стерлинг) жаримага тортган эди. Ташкилот аёллар жамоаларини алоқадор компанияларга сотишни даромад сифатида кўрсатишга рухсат бермаган.
Аниқлик киритилишича, "Ньюкасл"нинг молиявий ҳолати ва жамоанинг Чемпионлар лигасига йўлланма олиши даргумонлиги клубни етакчи футболчиларини сотишга мажбур қилиши мумкин.
