Италия терма жамоаси бош мураббийи Дженнаро Гаттузонинг келажаги ноаниқлигича қолмоқда.
Италия футбол федерацияси президенти Габриэле Гравина мураббийдан ўз лавозимида қолишни сўраганини ошкора тасдиқлади, бироқ мутахассис ҳали якуний қарорга келгани йўқ. Журналист Николо Скиранинг маълумотларига кўра, федерация раҳбарининг илтимосига қарамай, Гаттузо жамоанинг Жаҳон чемпионатига чиқа олмаганидан сўнг истеъфога чиқиш ҳақида жиддий бош қотирмоқда. Якуний жавоб яқин кунларда берилиши кутилмоқда.
Эслатиб ўтамиз, Италия терма жамоаси ЖЧ-2026 йўлланмаси учун кечган плей-офф финалида Босния ва Герцеговинага имкониятни бой берди. Асосий ва қўшимча вақтлар 1:1 ҳисобида якунланди, пенальтилар сериясида эса боснияликлар 4:1 ҳисобида ғалаба қозонишди.
Гаттузо ушбу лавозимни ўтган йилнинг ёзида эгаллаган эди.
