“Андижон”нинг янги мавсум учун амалга оширган трансферлари орасида грузиялик Александр Андроникашвили ҳам бор бўлиб, у илк бор чемпионатимизда тўп сурмоқда ва сифатли легионер эканлигини кўрсатмоқда.

Қисқа фурсат ичида бошқалар қатори Андроникашвили ҳам мухлисларнинг эътирофига сазовор бўлмоқда.

Сандро номини олган ушбу футболчи куни кеча клуб матбуот хизматига интервью берди.

— Сандро: исмингиз бошқача бўлса-да, Сандро номи қандай пайдо бўлган?

— Александр – катта исм. Грузияда биз уни қисқартириб Сандро деб атаймиз.

— Мамлакатимиз ҳамда чемпионатимизга кўникиб қолдингизми?

— Ҳа. Мен ҳам мослашишда ҳеч қандай қийинчиликка дуч келмадим. Клуб, футболчилар ва мухлислар менга бу борада катта ёрдам беришди.

— Андижондаги ҳаётингиз қандай кечяпти?

— Бу ерда яшаш жуда ёқимли ва илиқ муҳит ҳукм суради. Менга ёқди.

— Бу ерга келмасдан аввал клуб базаси ҳақида эшитгандингиз. Энди эса уни ўз кўзингиз билан кўриб турибсиз. Фикрларингизни билмоқчиман.

— Ҳа, мен буни ўз кўзларим билан кўрганимда жуда ҳайратландим. Ҳаттоки, кўплаб юқори савиядаги Европа чемпионатларида ҳам бундай машғулот базаси йўқ.

— Бу ердаги ва Грузиядаги турмуш тарзи ўртасида ўхшашликлар борми?

— Албатта, бу ерда ҳам, Грузияда ҳам жуда кўп хушмуомала ва дўстона одамлар бор.

— Дастлабки 4 та тур ортда қолди. Чемпионат даражаси ҳақида нима дея оласиз?

— Менинг фикримча, бу рақобатбардош чемпионат. Кўплаб чиройли голлар урилди ва яхши лаҳзалар яратилди. Бу эса чемпионатни янада қизиқарли қилади.

— Сиз учун клубдаги энг қувноқ ва жиддий футболчи ким?

— Энг қувноқ – Ашортия билан Черан. Энг жиддий – менимча Жамшид (Болтабоев).

— “Насаф”га қарши ўйин яқинлашмоқда. Тайёргарлик қандай кечмоқда?

— Бизда ушбу учрашувга тайёрланиш учун етарлича вақт бўлди. Ўйлайманки, бўлажак ўйинга биз оптимал формада етиб борамиз.