Аргентина терма жамоаси ҳужумчиси Лионель Месси яқинда бўлиб ўтган ўртоқлик учрашувида Замбия дарвозасини ишғол қилди.

«Альбиселесте» 5:0 ҳисобида ғалаба қозонган бўлса, «Интер Майами»нинг 38 ёшли футболчиси иккинчи гол муаллифига айланди. FIFA World Cup Stats хабарига кўра, Месси ўз фаолияти давомида жами 40 та турли терма жамоалар дарвозасига гол уришга муваффақ бўлган. Ушбу кўрсаткич бўйича рекорд Криштиану Роналдуга тегишли — у Португалия сафида 48 та ҳар хил рақиб дарвозасини ишғол қилган.

Лионель Мессининг Аргентина терма жамоасидаги дебюти олис 2005 йилда бўлиб ўтган эди. Ҳужумчи миллий жамоа сафида жами 198 та ўйинда иштирок этиб, ўз ҳисобига 116 та аниқ зарбани ёздириб қўйган.

Роналду жароҳати сабабли португалияликларнинг март ойидаги йиғинини ўтказиб юборди.