«Пари Сен-Жермен» ярим ҳимоячиси Фабиан Руис тиззасидаги жароҳатидан сўнг тикланиш жараёнини давом эттирмоқда.
29 ёшли футболчи тўп билан ишлашни бошлади, бироқ ҳамон индивидуал тарзда шуғулланмоқда — у ҳозирча жамоавий машғулотларга қўйилмаган, дея хабар беради Le Parisien. Испаниялик футболчи парижликларнинг жума куни Лига 1 доирасида «Тулуза»га қарши бўлиб ўтадиган баҳс қайдномасига киритилиши даргумон, шунингдек, унинг Чемпионлар лигаси 1/4 финалидан ўрин олган «Ливерпуль» билан дастлабки учрашувдаги иштироки ҳам сўроқ остида турибди.
«ПСЖ» келгуси чоршанба, 8 апрель куни ўз майдонида «Ливерпуль»ни қабул қилади, 14 апрель куни эса «Энфилд»да жавоб учрашуви бўлиб ўтади.
Фабиан Руис январь ойидан бери майдонга тушгани йўқ.
