Ёзги трансфер ойнасининг очилишига оз вақт қолмоқда. Мадриднинг «Реал» клуби олдида турган асосий мақсадлардан бири майдон марказини кучайтиришдан иборат.
«Реал»нинг эътибор марказида бўлиб турган ярим ҳимоячилар орасида «Ньюкасл» аъзоси Сандро Тонали ҳам бор. AS нашрининг хабар беришича, Тоналининг агенти футболчи хизматларини Мадрид клуби президенти Флорентино Пересга таклиф қилган.
25 ёшли Сандро Тоналининг қиймати Transfermarkt портали томонидан 80 миллион еврога баҳоланмоқда. Аввалроқ матбуотда италиялик футболчига Премьер-лига грандлари — «Манчестер Сити» ва «Манчестер Юнайтед» қизиқиш билдираётгани ҳақида хабарлар тарқалган эди.
Жорий мавсумда Тонали 47 та ўйинда майдонга тушиб, ўз ҳисобига учта гол ва еттита голли узатмани ёздириб қўйди.
