«Манчестер Сити» ярим ҳимоячиси Бернарду Силва «Барселона»га ўтиши мумкин.

Португалиялик футболчининг амалдаги шартномаси шу ёзда якунига етади ва кўринишидан, у узайтирилмайди. The Sun журналисти Мартин Блэкберннинг маълумотига кўра, айни дамда «шаҳарликлар» сардори учун курашда Каталония гранди пешқадамлик қилмоқда. 31 ёшли футболчи ватанига яқинроқ жойга кўчиб ўтишни истамоқда ва «Барса» варианти уни тўлиқ қониқтиради. «Кўк-анорранглилар» бош мураббийи Ханс-Дитер Флик тажрибали хавбек унинг жамоасига катта ёрдам беради деб ҳисобламоқда.

Бернарду Силвага шунингдек, «Ювентус», «ПСЖ» ва Туркия чемпионати вакилларидан ҳам қизиқиш борлиги айтилган эди. Эслатиб ўтамиз, футболчи 2017 йилдан бери «Манчестер Сити» шарафини ҳимоя қилиб келмоқда.