«Челси» ярим ҳимоячиси Энцо Фернандес Мадриднинг «Реал» клуби учун трансфер мақсади бўлиб турибди.

Кўплаб миш-мишларга кўра, аргентиналик футболчининг ўзи «қироллик клуби»га ўтишни истамоқда ва яқинда бунга ишора ҳам қилиб ўтди. Guardian нашрининг маълумотларига кўра, «Челси»да ҳамма ҳам ярим ҳимоячининг ўйинидан ҳайратда эмас: баъзилар унинг кетиши жамоа учун фалокат бўлмаслигини таъкидламоқда. Шунга қарамай, лондонликлар 25 ёшли ўйинчи учун катта миқдорда маблағ талаб қилишади. «Реал» эса сўралаётган 100 миллион фунт стерлинг (тахминан 115 миллион евро) миқдоридаги маблағни тўлаш ниятида эмас.

Энцо Фернандеснинг «Челси» билан шартномаси 2032 йилнинг ўрталаригача мўлжалланган. Transfermarkt портали футболчининг қийматини 90 миллион еврога баҳоламоқда.