«Милан» устози Массимилиано Аллегри Италия терма жамоасида Женнаро Гаттузонинг ўрнини эгаллаши мумкин бўлган номзодлардан бири сифатида кўрилмоқда.
«Скуадра Адзурра» яна жаҳон чемпионатига чиқа олмади ва яқин вақт ичида Гаттузо бош мураббийлик лавозимини тарк этиши тахмин қилинмоқда. Бироқ, Sky Sport нашрининг маълумотларига кўра, Аллегрининг терма жамоага тайинланиши эҳтимоли жуда паст. 58 ёшли мутахассиснинг «Милан» билан 2027 йилгача мўлжалланган шартномаси бор ва клуб раҳбарияти мураббий билан хайрлашишни истамаяпти — томонлар аллақачон кейинги мавсум учун режалар тузишни бошлаб юборишган.
Италия миллий терма жамоаси бош мураббийлигига номзодлар қаторида шунингдек, Антонио Конте ва Роберто Манчини номлари ҳам тилга олинмоқда.
