"Барселона" ҳимоячиси Андреас Кристенсен клубдан шартномани узайтириш бўйича таклиф олган, бироқ ҳозирча унга жавоб бергани йўқ. Бу ҳақда Diario SPORT нашри хабар бермоқда.
Манбанинг маълумотига кўра, каталонияликлар ўз футболчисига иш ҳақини камайтирган ҳолда бир йиллик янги шартнома таклиф қилишган. Ҳозирча Кристенсен бу келишувга қўл қўйиш-қўймаслиги номаълум, айниқса, агар "Барселона" шу ёзда "Интер"дан Бастонини сотиб олса, вазият янада чигаллашиши мумкин.
Аввалроқ Кристенсен тиззасидаги хочсимон бойламларидан жароҳат олиб, тахминан бир ойга сафдан чиққан эди.
Жорий мавсумда 29 ёшли даниялик футболчи барча мусобақаларда 17 та ўйинда майдонга тушиб, битта гол урди. Футболчининг "кўк-анорранглилар" билан амалдаги шартномаси шу йилнинг июнь ойи охирида якунига етади.
