«Барселона» ҳужумчиси Ферран Торрес Испания Ла Лигасининг жорий мавсумида гол уриш учун яққол имкониятларни бой бериш бўйича етакчилик қилмоқда.

26 ёшли испаниялик футболчи 19 та «катта» имкониятдан фойдалана олмади — бу чемпионатдаги энг ёмон кўрсаткичдир, деб қайд этмоқда WhoScored нашри. Иккинчи ўринда «Вильярреал» аъзоси Жорж Микаутадзе (18 та) бормоқда, кейинги поғонани эса «Мальорка» ҳужумчиси Ведат Мурики (16 та) эгаллаб турибди. Мадриднинг «Реал» клуби юлдузи Килиан Мбаппе ва «Барселона» ҳужумчиси Роберт Левандовски 15 тадан аниқ голли вазиятни кўкка совурган ҳолда тўртинчи ўринни бўлишиб туришибди.

Ла Лига тўпурарлар рўйхатида Ферран Торрес 12 та гол билан бешинчи ўринни эгаллаб турибди. Энг яхши тўпурар эса Килиан Мбаппе бўлиб қолмоқда — унинг ҳисобида 23 та аниқ зарба мавжуд.