«Челси» ярим ҳимоячиси Мойсес Кайседо жорий мавсум давомида жамоада юз берган мураббий алмашинуви борасида ўз фикрларини билдирди.
Январь ойида «кўклар» бош мураббийи лавозимидан Энцо Мареска истеъфога чиқарилган эди. Италиялик мутахассиснинг ўрнини Лиам Росеньор эгаллади.
«Ҳа, бу қийин бўлди, чунки биз Марескага ва унинг футболига ўрганиб қолгандик. Росеньор қўл остидаги мослашиш жараёни осон кечмаяпти, аммо биламанки, бу шунчаки вақт масаласи — секин-аста янги талабларга кўникиб борамиз. Ҳозир бутун жамоа қийинчиликларни бошдан кечирмоқда, бироқ олдинга интилишда давом этишимиз керак — олдинда бизни кўплаб яхши кунлар кутмоқда», — дея Кайседонинг сўзларини журналист Эдуардо Бургос келтирмоқда.
«Челси» Премьер-лиганинг 31-туридан сўнг турнир жадвалида олтинчи ўринни эгаллаб турибди.
