Номзодлар турнири 6-туридан сўнг Жавоҳир Синдаров Вей Йи устидан қозонган ғалабасини батафсил шарҳлаб берди.

Унинг айтишича, партия мураккаб ва икки томон учун ҳам хавфли бўлган:

“Бошланишида позиция ёмон эмас эди, лекин бир пайт бироз ноқулай бўла бошлади. Кейин фил d4'га келгач, ўйиним очилди. Шу билан бирга вақт устунлиги ҳам пайдо бўлди ва аста-секин босим қилишни бошладим”.

Синдаров ўйиннинг муҳим жиҳатларидан бири — вақт омили эканини яна бир бор таъкидлади:

“Агар вақт кўп бўлса, ўзингни анча дадил ҳис қиласан. Кичик тактик деталларни ўтказиб юбормаслик жуда муҳим. Шунинг учун вақт устунлиги бўлса, тезроқ ўйнайман, лекин ҳаммасини текшириб бораман”.

У дебют босқичи ҳақида ҳам қизиқарли фикр билдирди:

“4-юришдан кейин мен деярли тайёргарликдан чиқдим. Бу вариантни аниқ тайёрламагандим. a3 юриши мен учун кутилмаган бўлди, лекин позиция жуда ёмон эмас — ўйнаса бўладиган эди”.

Динамик позициялар унинг услубига мос келишини ҳам яширмади:

“Мен динамик ўйинларни ёқтираман. Иккала томон учун ҳам ғалабага имкониятлар бўлган позицияларда ўйнашдан завқ оламан”.

Синдаров ҳатто дуранг натижани ҳам ёмон деб ҳисобламаганини айтди:

“Агар рақиб жуда аниқ ҳимояланса, дуранг ҳам ёмон натижа бўлмасди. Лекин цейтнотда у кичик хатоларга йўл қўйди ва мен уларни аниқ ишлата олдим”.

Турнир давомида қандай ёндашувни танлагани ҳақида эса у шундай деди:

“Бу менинг биринчи Номзодлар турнирим, албатта жуда муҳим турнир. Лекин ортиқча босим бўлса, ўйнаш қийинлашади. Шунинг учун шунчаки оддий шахмат ўйнашга ҳаракат қиляпман”.

Ўзига бўлган ишонч ҳақида эса у жуда муҳим фикр билдирди:

“Агар турнир олдидан яхши тайёрлансам, ўзимга ишонаман. Қийин позицияларда ҳам тўғри юришларни топа олишимга ишонч бўлади”.

Якунда у яна бир муҳим жиҳатни таъкидлади:

“Бу вақт назоратида ўйнашни ҳам энди ўрганяпман. Ҳали кўп нарсани ўрганишим керак, лекин ҳозирча ҳаммаси яхши кетмоқда”.

Энди эртага 1-давранинг охирги ўйини Аниш Гирига қарши бўлиб ўтади.