«Барселона» бош мураббийи Ханс-Дитер Флик Ла Лиганинг 30-туридан ўрин олган «Атлетико» Мадридга қарши баҳсдаги (2:1) ғалабадан кейин ўз фикрлари билан ўртоқлашди. Ушбу учрашувда бош ҳакам Матео Бускетс Феррер VAR ёрдамида меҳмонлар ҳимоячиси Херард Мартинга кўрсатилган қизил карточкани бекор қилди.
— Биз ўйинни назорат қилдик ва уч очкони қўлга киритдик, бу энг муҳими эди. Ламин Ямал асабийлашди, чунки у гол уриш ёки ҳал қилувчи пас бериш имконини қидирди, аммо бу амалга ошмади. Бу оддий ҳолат. Гол уришга уринган вазиятларимиз бўлди, жуда ҳиссиётларга бой ўйин кечди.
Мен Херард Мартин билан боғлиқ вазиятни такрорда кўрмадим. Жонлида у тўпга биринчи бўлиб етиб борганини кўрдим, мен учун бу қизил карточка эмас.
Эртага Рональд Араухо ва Берналнинг ҳолатини текширамиз. Тиббий кўрик натижалари маълум бўлади. Жиддий жароҳат деб ўйламайман. Умид қиламизки, ҳеч қандай жиддий муаммо йўқ, — деди Флик. Манба: Marca.
30 турдан сўнг "Барселона" 76 очко жамғариб, мусобақа жадвалида пешқадамлик қилмоқда. "Атлетико Мадрид" эса 57 очко билан 4-ўринни эгаллаб турибди.
Кейинги турда Флик жамоаси 11 апрель куни ўз майдонида "Эспаньол"ни қабул қилади. Шу куни Диего Симеоне шогирдлари сафарда "Севилья"га қарши майдонга тушади.













