«Комо» жамоаси устози Сеск Фабрегас мураббийлик фаолиятининг бошида Микель Артета билан маслаҳатлашганини ёдга олди.

38 ёшли испаниялик мутахассис 2024 йилдан бери Италия клубида бош мураббий лавозимида ишлаб келмоқда.

«Мен Артета билан гаплашиб, бу ишга тайёр эканлигимга ишончим комил эмаслигини айтгандим. У эса шундай жавоб берди: «Ҳатто ҳозир тайёр бўлмасанг ҳам, ичингдаги рақобатбардошлик сени ечимлар қидиришга ундайди ва ўз қарашларингни шакллантиришга ёрдам беради». Орадан икки йил ўтиб айтишим мумкинки, Микель ҳақ эди. Мураббийлар штабим менга маслаҳатлар бериб турди, лекин якунда қарор қабул қилиш ва масъулиятни ўз зиммамга олиш барибир менинг вазифам эди», – дея инглиз ОАВлари Фабрегаснинг сўзларини келтирмоқда.

«Комо» А Сериянинг 30 та туридан сўнг турнир жадвалида тўртинчи ўринни эгаллаб турибди.