80 ёшли Мирча Луческунинг соғлиғи ёмонлашди. "Зенит" ва "Шахтёр" клубларининг собиқ мураббийи Руминия терма жамоаси машғулотида ўзини ёмон ҳис қилганидан сўнг шифохонага ётқизилган эди. Касалхона берган маълумотга кўра, у жума куни ўткир миокард инфарктини бошдан кечирган.
Якшанба куни эрталаб Бухарест университети касалхонаси вакиллари мутахассис кечаси яна жонлантириш бўлимига (реанимация) ўтказилганини маълум қилишди.
"Шанба куни кечқурун беморда яна жиддий юрак аритмияси кузатилди, бу кардиология бўлими навбатчи гуруҳи томонидан тезкорлик билан бартараф этилди.
Бироқ якшанбага ўтар кечаси аритмия кучайди ва муолажаларга бўйсунмай қолди. Беморнинг ҳолати ёмонлашгани сабабли, уни анестезиология ва интенсив терапия бўлимига ўтказиш талаб этилди.
Ҳозирча янги ўзгаришлар йўқ. Вазият тақозо этса, яна расмий маълумот берамиз", — дейилади якшанба куни эрталаб эълон қилинган шифохона пресс-релизида.
